政情：邱武加車稅歪論遭圍插
立法會正審議增加汽車首次登記稅嘅草案，好多政黨都唔支持呢項唔得民心嘅加稅措施，政府卻一意孤行，主責嘅運輸及房屋局副局長邱誠武前日喺立法會上繼續死撐，仲諉過於私家車車主，話香港各區車速減慢，證明交通擠塞惡化，所以一定要加稅，結果呢個歪論激起大量網民鬧爆。
邱武歪論一出，香港討論區即時有網民留言，大鬧邱武係「生草藥」，噏得就噏；亦有滿腔怒火嘅網民話：「邱誠武係乜水呀，火星人嚟㗎？」叫佢喺放工時間去彌敦道、軒尼詩道睇吓，係咪私家車塞住條路？亦有網民指正邱武，話車速減慢係因為多咗影快相、少咗人超速。此外，亦有網民建議，與其加車稅，不如加牌費啦，或者檢討吓巴士路線，再唔係就少啲整路或者夜啲先整，總之乜嘢意見都有。