政情：區區有骨灰龕魔鬼在細節

復活節假期尋日開始，食物及衞生局局長周一鑊日前趕住喺長假期前，急急宣布咗第三批共六幅土地興建骨灰龕場，呢六幅土地包括可能係全港最大三個骨灰龕場所在嘅元朗、大埔同荃灣區三幅地。雖然政府口口聲話十八區區區都要有骨灰龕，不過，同周一鑊會面嘅區議會主席就有人感慨魔鬼喺細節中，質疑所謂區區半斤八両假到出汁！

周一鑊日前同地區人士見面時，除咗講到最新推出嘅六幅骨灰龕土地外，仲講到全港十八區，區區都有骨灰龕土地一事。按照政府早前披露嘅時間表，今年第二季展開全面諮詢後，希望盡快將興建或改建骨灰龕嘅工作定落嚟。

佢喺會面中，好巧妙咁話十八區嘅骨灰龕選址將提供數十萬個龕位，不過，九龍區嘅選址地方少，可以提供嘅龕位少，但荃灣、大埔、元朗則最多。多成點？依家仲係十畫都未有一撇，政府梗係冇數啦，不過三個地區嘅影響就好大囉。

荃灣大埔元朗成「大戶」

有區議會主席事後向地區人士明言，指政府雖然話十八區都要有骨灰龕，但呢個人人有份嘅計劃只係一記虛招，事實好多區嘅選址都係喺舊有墳場或設施擴建，可提供嘅龕位好有限，大部分新增龕位幾乎由荃灣、大埔、元朗區瓜分，佢哋質疑咁點叫公平﹖

好似黃大仙、離島甚至中西區咁，政府擬議嘅龕位都係喺舊嘅設施擴建，區議會處理問題時，遇到居民嘅阻力細好多。但荃灣、大埔同元朗就好唔同，呢啲地區要起骨灰龕係從冇到有，仲要一起就大大個，區議會點游說居民呢？該名地區人士明言，復活節假期後，就會同一樣深受影響嘅地區通吓聲氣，研究係咪攜手應付政府表面公平、查實一啲都唔係半斤八両嘅政策。