政情：Jocelyn讚「凱瑟琳」似餅印
名模Jocelyn Luko尋日出席「Let's Celebrate皇室世紀婚禮」，同遠道而嚟、因貌似英國準王妃凱瑟琳而國際成名嘅英國女子貝文（Kate Bevan）見面，即大呼對方同準王妃嘅相似度百分百，尤其眼睛最為相似。Jocelyn認為威廉王子同凱瑟琳好襯外，仲話自己小時候亦曾夢想做王妃或公主，又笑住話：「細個我成日扮公主，不過依家我老公就好似王子咁，對待我就好似公主一樣！」咁有冇香港女仔嘅公主病？佢話：「我認為堅強獨立嘅女性至係真正嘅公主。」
貝文直言認為自己嘅眼睛同凱瑟琳最似，依家學習緊佢嘅笑容，已婚嘅佢仲話成名後都有追求者慕名而至。至於老公似唔似威廉王子，佢就話：「唔似，但佢就似威廉王子嘅細佬哈利王子！」
Jocelyn（左）話貝文（右）對眼同準王妃凱瑟琳最似。