政情：利子厚遊獅城歎美食
放復活節假囉！唔少人都會外遊叉電。好似馬會大董利子厚就約定班好朋友，去新加坡玩足四日，除遊覽著名景點同賭場外，仲會大歎咖喱蟹同海南雞飯。獅城各方面都係香港嘅頭號競爭對手，依家連利大董都被吸引埋，香港嘅美食天堂地位豈不是岌岌可危？利大董話唔使怕，事關兩地美食各有千秋，佢只係欣賞獅城嘅特色食品喎。
香港專業及資深行政人員協會會長Herman胡曉明夫婦就話唔會出門，事關佢嘅囝囝正忠放假返港，所以要做廿四孝爸媽陪伴囝囝去玩，前日一家三口仲入咗快活谷馬場湊熱鬧添！正忠依家喺美國約翰霍金大學研究院修讀生物科技，所以Herman都想囝囝將來成為科學家。
復活節去邊玩？利子厚選擇去新加坡。
咁啱囝囝胡正忠（左）放假返港，胡曉明前日帶埋佢入馬場見識吓。