政情：肥亨難忘一家之煮歲月
中策集團主席馬時亨日前接受電視節目訪問，重遊成長嘅北角書局街舊居，勾起唔少童年點滴，提起當年擔起一家之「煮」嘅重擔，以及舅父曾啟榮（藝人曾志偉嘅爸爸）供佢讀大學時，更加感受至深。
肥亨話當年一家六口住喺百幾呎嘅板間房，要同鄰居共用廚房同廁所。佢十幾歲嗰陣爸爸就過身，媽咪要母兼父職返工搵錢，做老大嘅肥亨要負責買餸煮飯同照顧弟妹。佢話原本佢中學畢業後就要工作幫補家計，但好彩有舅父支持，佢先至有機會讀到大學。
佢又到母校香港大學緬懷拍拖往事，雖然佢同太太Linda王培琪當年一齊讀港大，但原來Linda曾嫌佢老土，令兩人未能撻着，直到後來佢哋喺加拿大重遇至開始拍拖，並結為夫婦。肥亨仲自爆情史，話當年嘅拍拖對象，有一個係港大女生，證明佢嘅情史豐富。