舊年個市較前年升得靚，唔少基金都賺到笑，近排基金都依賺錢成績陸續派咗「B仔」（花紅），大家自然好開心。有業界老友話，有位華資行基金經理獲派幾千萬B仔，計計吓一個禮拜賺過百萬，投資界術語叫一百萬元做一「球」，所以呢位金牌基金經理就被封為「星球人」。
聽老友講到眉飛色舞，就知佢份B仔都好和味，難道佢都係星球人一員？老友就笑笑口話，要做星球人談何容易，自己一啲都唔貪心，但願做番個「月球人」，即係一個月賺番一球嘅人，都已經好開心喇！