政情：民間電台申請牌照被耍
曾多次進行非法廣播而遭檢控嘅民間電台又有新搞作，台長「阿牛」曾健成同立法會議員「長毛」梁國雄，尋日帶同一班義工到廣播事務管理局秘書處開會，嘗試了解申請數碼廣播牌照嘅方法同要求。負責擔任廣管局秘書處工作嘅影視及娛樂事務管理處亦唔敢怠慢，派出助理處長鄭青雲應付呢班「貴賓」，仲令阿牛等人敗興而返。
話說當時鄭青雲嘅態度謙恭且笑容滿面，但答嘅都係官樣文章，揸住守則同法律照本宣科，即使幾努力回應阿牛同長毛嘅提問都冇用，因為佢始終冇話事權。佢仲話依家香港可供數碼廣播嘅頻譜已經滿晒，除非電訊管理局肯開放頻譜，否則即使份計劃書做得幾好都唔使旨意獲批牌照喎。最終搞到長毛提早離場，以示無奈。
阿牛（右一）同長毛（左三）去廣管局秘書處開會敗興而返。