政情：搞搞政：怪胎關愛基金食檸檬

關愛基金督導委員會日前拍板動用七億三千萬元，推行包括資助清貧學童遊學等十個項目，嚟緊會喺下月六號到立法會財委會申請撥款。據聞政府今次已學精，晨早展開拉票行動，可惜仍慘食檸檬收場。

新民黨主席葉劉淑儀早前批評過關愛基金好似怪胎，佢尋日仲透露，日前有官員向佢就基金嘅撥款拉票，卻慘食檸檬。公務員出身嘅佢直言，政務官一向都做緊一張清單，研究有乜社福項目值得政府去做，如今政府無端端成立咗個基金出嚟，仲委任埋唔少政治同社福人士入去，猶如架空班公務員，將佢哋嘅工作交到呢個政治組織手中，令佢哋好不滿喎。

政府委任咗唔少有政黨背景嘅人士加入基金，無非係為咗令基金入面嘅項目更易通過。不過，雖然白鴿黨成員羅致光獲委任為基金執委會主席，但該黨黨團召集人李華明話佢哋唔會義無反顧支持基金撥款。佢話有錢幫弱勢人士固然好，但佢始終唔太滿意基金嘅本質，認為政府大把錢做好呢方面嘅工作，唔明點解要商界出一半。佢仲話當初羅致光已向黨表明唔使「錫住佢」，所以白鴿黨最後投唔投票支持撥款，都要再喺黨團商討喎！