政情：曾班子搵真銀有自己友保駕

前房屋規劃及地政局常秘梁展文重投新世界關連公司懷抱，再次引發應否進一步延長高級公務員離職後就業「冷河期」嘅討論。原來依家煲呔曾同一眾政治問責官員，離職後就業嘅「冷河期」僅得一年，仲短過好多權力同薪酬都比佢哋少嘅高級公務員，非常唔公平，而且負責審批有關申請嘅「前任行政長官及政治委任官員離職後工作諮詢委員會」（前特首離諮會），仲係由煲呔曾一手委任，好難令公眾覺得百分百公正。

鄭慕智延任純粹巧合？

政府尋日更宣布，煲呔曾已經新委任同再度委任多名前特首離諮會委員，其中獲延任嘅舊人有主席鄭慕智、委員梁乃鵬、成小澄同雷添良，新委員則有廖柏偉，接替已在任六年「夠鐘」落任嘅李焯芬。五名新舊委員嘅任期全部到一三年六月三十號。

眾所周知，煲呔曾將於喺一二年六月三十號任滿下台，以一年冷河期計算，如果佢想喺一三年六月三十號之前下海搵真銀，就要經過呢個前特首離諮會審批。煲呔曾今次將鄭慕智等人嘅任期延長至一三年六月三十號，啱啱好就可以處理埋佢自己嘅所有再就業申請，真係好難令人相信係純粹巧合囉！

白鴿黨立法會議員李永達就話，由煲呔曾一手委任嘅人，處理番自己同佢嘅管治班底將來嘅再就業申請，難免令人有「瓜田李下」同「自己人批番自己」嘅感覺。佢認為煲呔曾最多只應將前特首離諮會嘅任期延長至一二年六月底，即係同現屆政府共同進退，再由新一屆特首委任全新嘅離諮會，處理番煲呔曾等上一屆政府高官嘅再就業申請，咁先會畀市民覺得公正。

其實除咗煲呔曾，仲有好多名現任司局長都九成九唔會過渡至新一屆政府，同樣受惠於煲呔曾今次任命，包括炮製出「史上最廢」預算案、下屆肯定冇得留低嘅財政司司長鬍鬚曾，同埋年紀有番咁上下嘅教育局局長孫明揚及保安局局長李少光等，鄭慕智肯定會批到手軟。