政情：搞搞政：鼠王芬過界抽水

曾幾何時，十分賣力捉老鼠嘅西九新動力立法會議員梁美芬，被人稱呼為「鼠王芬」，但依家睇嚟佢可以改名叫「抽水芬」嘞！

我哋講緊嘅係真正嘅抽水，西九新動力喺舊年八月，喺大角咀新油麻地避風大塘抽水做水質測試，點知真係畀佢哋發現大腸桿菌超標一百八十倍。抽開有鋪癮，佢哋今年一月更移師土瓜灣馬頭角尾，甚至千里迢迢，遠赴新界西嘅荃灣西鐵站、渡輪碼頭對出海面再抽過，結果又畀佢哋發現大腸桿菌含量超標。

抽水芬尋日帶埋傳媒去土瓜灣實地視察，果然該處飄嚟陣陣惡臭，海面亦見到唔少垃圾。抽水芬話工作人員抽水去做化驗嘅時候，仲發現有屎喺度浮嚟浮去，認真核突！荃灣西亦唔見得好好多，嗰度嘅居民投訴過曾經被風吹嚟嘅臭味臭醒咗添。

年底區議會選舉臨近，呢個時候地區工作不容有失，難怪抽水芬咁積極抽水，但係抽到過晒界，由九西抽到新西，就真係令人嘆為觀止，唔知佢咁做，又怕唔怕畀人話佢「抽水」呢？