政情：新聞處高官唔敢收厚禮

如果有張免費機票飛落喺你頭上，你會有乜嘢反應？新聞處助理處長吳葉潔英（Jean）嘅反應就係送番出去。佢月初出席一個團體聚會時，抽中兩張商務客位機票，冇限目的地，價值可以高達十八萬元，阿Jean當時欣然接受，但為免瓜田李下，翌日就退番機票畀主辦單位嘞。

黃偉綸否認默許

原來阿Jean抽到嘅機票係當日嘅頭號大獎，有與會者話見到佢中獎時有啲驚訝，同時極速望咗在席嘅新聞處處長黃偉綸（Michael）一眼，後者微微點頭後佢就上台攞獎。不過在席有人議論紛紛，認為機票金額唔細，作為公務員唔應該接受呢份厚禮。

我哋向阿Jean求證，佢證實中咗獎，但話好快已退番畀主辦單位。點解又收又退呢？佢指當時席間嘅氣氛好好，如果硬生生退回禮物，就好似潑人冷水咁，但話自己唔太鍾意旅行，加上份機票有好多限制，金額又高，最後都係決定退回，費事惹人話柄。

Michael就否認默許阿Jean收禮，佢話公務員收取嘅每份禮物都要填表登記，正常都要辦公時間至可以做到，所以一般公務員出席晚宴抽到禮物，都會先拎番部門，再向上司申報。