政情：馬雲要囝囝同佢講真話

阿里巴巴主席馬雲最近喺清華大學演講，話其實佢小時候夢想係入清華北大，最終冇考上。小學讀咗七年，中學讀咗三年，小學時佢係最叻嘅學生之一，後來幾乎冇中學收佢，參加考試更全軍覆沒。佢自言一無所有，亦冇有錢嘅老竇，但好彩生喺呢個有互聯網嘅時代。

馬雲當然係勤力嘅人，就算開會食飯都好勤力溝通。佢笑言其他商家愈食愈肥，佢就愈食愈瘦，皆因大部分嘅時間，佢都係聽其他人講，或者講自己認為要堅持嘅事，所以根本冇時間食。

講到人才管理，佢有更多理論，例如「不相信有一流的人才，只相信有一流的努力」、「企業創新不是為對手競爭，而是跟明天競爭」，佢自認唔係一流人才，但都不至於去到四流。

馬雲話阿里巴巴需要嘅係平凡嘅人，仲攞咗寫畀個仔嘅信嚟做比喻，佢喺封信內送咗三個道理畀十八歲嘅仔：永遠用自己嘅腦袋思考問題，獨立判斷；世界有很多解決唔到嘅問題，所以要永遠保持樂觀心態；講真話，跟老爸講真話。