政情：挾阿涂選區會白鴿黨又內訌

白鴿黨班高層上禮拜日喺上水雙魚河搞咗個腦震盪會，傾吓年底區議會選舉宣傳嘅安排，點知又再凸顯黨內矛盾。

據悉，喺腦震盪會中，有人認為一向唔投票嘅中間選民，多數會支持白鴿黨嘅理念，所以一定要炒起年底嘅區議會選舉，最好嘅方法就係搵啲夠叫座力嘅知名人士落區參選，希望藉機拉高投票率，就算選唔到都對出年嘅立會選舉有幫助。

白鴿黨有半數立法會議員唔係「雙料議員」，包括張文光、李華明、劉慧卿同涂謹申。張文同肥仔明擺明車馬做埋出年就退休，獲得豁免唔使選區會，而卿姐一早講明唔做雙料。

為咗有最多夠知名度嘅人參選區會，有說阿涂就成為主要游說目標，但佢就耍手擰頭，最後眾人發現軟攻唔得，就夾硬翻佢舊帳，話九龍西喺阿涂嘅領導下長期積弱，佢作為領袖應該做番啲嘢，振奮士氣。聽聞阿涂聽完好激氣，差啲反枱，最終游說失敗，不歡而散。

唔會參選超級區會議席

之後向阿涂求證，佢對會上嘅爭拗不置可否，但就話就算選到做區議員，都唔會參選超級區會，因為佢本來就反對政改方案，只係遵從黨嘅決定至投贊成票，所以好難要求佢違反意願做埋超級議員喎。佢又分析，如果佢唔參選超級區會，咁對區議會選舉嘅邊際效益亦隨之減弱，所以個人出選意願好低，但最終要交番畀黨決定。

其實，唔少人都不滿今次黨高層嘅「高層夾擊」行動，有人認為黨內根本唔需要咁多人去選區議會，只係黨高層擔心黨主席何俊仁同李永達會選唔到區議會。亦有人覺得，推高投票率人人有責，應該叫埋卿姐選區議會至唔會落人口實。