SUN世代：34歲網吧大王搵錢有動力

大部分白手興家的人，都是自幼家貧、對金錢極度渴望、從不放過任何賺錢機會，陳龍盛（Eddy）也不例外，因為貧窮，他將搵錢視為工作推動力，中七未畢業，每月兼職的收入已高過一般大學畢業生，錢途無限下，放棄升讀大學機會，全力創業。今時今日，他三十歲出頭，有車有樓，公司旗下擁有三十間網吧，是全港最具規模的網吧連鎖店東主。

「自細就鍾意做生意。去飲珍珠奶茶，我會諗：呢門生意好唔好賺？利潤係點？間公司嘅管理做得好唔好？」今年三十四歲的陳龍盛，一說起生意經就滔滔不絕，愈說愈興奮。他年幼時住木屋區，全家只靠父親一人在工廠打工的收入，維持一家四口的生計，「啱啱夠生活，但係無錢剩。」童年經歷過貧窮，反而激發他奮發圖強的念頭：「我睇唔到屋企會有朝一日突然變有錢，明白要靠自己努力搵錢。如果細個時物質太豐富，反而唔會立志為錢而奮鬥！」

初中賣磁碟賺差價

在讀初中的時候，他就開展人生第一單生意：「當時仲用緊3.5吋磁碟儲存電腦資料，為咗慳錢，我會搭車去深水埗買，順便幫同學買埋。」後來見搭單人數愈來愈多，他索性直接向磁碟批發商入貨，然後以「黃金價」（即黃金商場的零售價）賣給同學，賺取當中約三、四成的差價。

中六暑假，他到一間電腦公司打暑期工，其他同事主力賣蘋果電腦（Apple）產品，Eddy憑着對個人電腦（PC）的熟悉，「幫公司開咗一條新戰線，賣咗好多PC，老細好信任我，話開間分店畀我搞，不過當時讀緊書，屋企人反對。」於是，他繼續升讀中七，但仍密密手做兼職；由於累積了大批客戶，不停有人找他買電腦，「讀完中七，月薪過萬蚊，多過大學畢業生。」在數字支持下，再與家人商量創業，今次由反對變成支持，於是，Eddy出來搞生意，「諗住試一、兩年，唔得再返去讀大學。」

客人鼓勵轉開網吧

Eddy先後涉足電腦零售、維修業務，又做過電腦產品代理，二○○二年決定轉行，是因為電腦售價愈跌愈多，邊際利潤大幅下降，「心諗呢行要結束」。他暫時收起笑容，然後說：「我好認同change呢樣嘢，要不斷轉變先可以生存。如果生意逆轉，就要壯士斷臂，唔可以同生意講感情！」

轉型做網吧，是當時剛巧有一名經營網吧的台灣人找他買電腦，並鼓勵他入行。「佢話唔使半年就可以回本。開頭我都半信半疑，後來發現真係好好賺，就同Patrick（指生意拍檔楊智亮）一齊合作搞網吧生意。」

不喜歡一個人做生意，是他另一心得：「創業嘅道路好孤單，我又怕悶，所以鍾意同人夾份做生意，遇到困難可以有人分擔、有人傾訴。」自己在創業過程中曾獲他人伸出援手，Eddy也樂於成為香港青年創業家聯盟一分子，與一眾年輕人分享創業經驗。「後生仔創業要面對好多疑難，但係要搵人幫助就好困難，有時父母、朋友都未必有經驗，所以呢樣工作好有意義。」