政情：搞搞政：環評衰咗邱騰華匿去北京

上月中旬日本福島爆發核危機，港人好擔心大亞灣核電廠嘅安全問題，但環境局局長邱騰華匿埋咗幾日先蒲頭，仲乜都唔肯講。不過，政府尋日突然出新聞稿，話邱局長尋日率領代表團去北京，同國家環保部轄下嘅國家核安全局交流，加深認識內地能源安全同發展，同埋日本福島核事故後，國家核安全局輻射監察同核設施安全檢查嘅工作。

福島核危機爆發距今成個月後先去做呢啲嘢，邱局長當然係後知後覺啦，亦令人質疑佢點解揀呢個日子訪京，事關高等法院前日裁定港珠澳大橋嘅環評違規，呢項工程係屬於運輸及房屋局局長Eva鄭汝樺負責，但環評係屬於邱局長嘅範疇，衰咗咯，責任梗係喺佢身上，但佢竟然一個屈尾十飛去北京，唔使上身，由Eva代為解畫。

正所謂避得一時，唔避得一世，咪以為閃咗去就可以甩身，邱局長返港後咪一樣要捱批。