政情：梁伯韜祝福光亞升五成
標普突然攞美國來開刀，搞到尋日個市大跌300幾點，但有一隻創業板股仔光亞，復牌後竟然一度暴升逾1.3倍，堪稱「逆市奇葩」。原來光亞嘅印尼附屬引入咗私募基金CVC Capital Partners為股東，頓時點石成金。
可能大家一時仲未醒起CVC係乜料子，其實CVC嘅專業團隊裏面其中一個顧問，就係「紅籌之父」、透過意馬大搞「喜羊羊」嘅梁伯韜。至於CVC近期嘅大搞作，就係以14.25億元將鴻興印刷近三成股權賣畀日本人，大賺五億幾銀。
由於CVC今次入股光亞附屬嘅模式，同○八年入股鴻興時相似，當然引起股民嘅期待。雖然光亞最終喺升幅榜上，輸咗畀大折讓供股嘅寶源控股，全日升幅得番百分之五十二，但梁伯韜「點石成金」嘅魔力似乎仍然未減。
