政情：建仔改口號做硬保皇黨
建仔尋日改選領導層，仲順便公布埋新口號，就係「一個有承擔嘅政黨」，同以前嘅「一個有前景嘅政黨」雖然只差兩字，但就令人引起無限想像，唔通係最近建仔成日畀政府跣，硬撐一堆唔合理嘅政策，頓悟出保皇黨「已無前景、只有承擔」嘅大道理？
冧莊黨主席嘅譚耀宗就話，改口號只係因為見到坊間部分政黨有啲為反而反，有啲就淨係識得謾罵同破壞，無助整體社會發展，所以先改口號強調建仔值得信賴，叫大家唔好諗咁多。
上屆立法會選舉喺九龍西跑出嘅Starry李慧琼當選副主席，係同期最早躋身領導層嘅新鮮人。外界一般揣測，Starry升任副主席係為咗下年參選超級區議會鋪路，但佢尋日否認之餘，仲話如果再參選立法會，佢嘅首選都仲係九西喎！
