政情：海關工會力抗空降關長

海關關長喺過去十二年都係由政務官（AO）空降，最近又傳出現任關長袁銘輝夠期升職，最初傳五月有變動，其後又傳七至九月，仲話係由一名女AO接任做新關長，有指連姓氏都開埋，繪影繪聲，難怪四個海關工會要約見公務員事務局常秘黃鴻超，其實都係想探聽吓風聲，同埋表明反對再由AO空降做關長。黃鴻超尋日同工會代表見面就大派定心丸，話未有任何關長調任嘅部署，又話會聽工會反對空降嘅意見。工會代表話黃鴻超都係前關長，佢嘅講法就信住先。

公務員事務局之後出稿回應，話任命關長會用人唯才；又話海關關長會優先考慮內部提升，若部門未有「合適的人選」，才考慮從其他職系借調。上任關長湯顯明喺○七年調任廉政專員後，都講過「關長的評選是按照當局所需的人才而定，不是空降」，明明空降都否認空降，睇嚟今次兩方面都係各自表述，空降問題仍然疑團未解。