政情：保險十人幫飯局鬥吹水
唔講唔知，原來保險界有個「十人幫」飯局，組成已經超過三十五年，成員個個都係保險界元老級人馬。保誠香港行政總裁Derek容佳明話「十人幫」飯局，初初由「保險教父」楊梵城、友邦香港名譽主席林文德等人發起；佢哋每隔一兩個月都會聚一聚，輪流請食飯之餘，順便交流吓近況，當然啦，聚會只限聯誼，有乜公事就留番第日返工講。據知，「十人幫」之中重有鄭文光、梁安福、劉鼎言等保險界猛人。
Derek話咁啱「十人幫」裏面九個人都係40後，而佢係唯一一個60後。講到新一代嘅80後，佢都好感嘆部分年輕人缺乏咗嗰種不怕磨練嘅鬥志，或者因為依家生活條件好，年輕人習慣咗較好嘅生活環境，希望年輕人可以訓練吓主動解決難題嘅能力。當然香港都有唔少上進有為嘅年輕人，佢話見到唔少員工公餘會去主動進修。
Derek希望年輕人可以訓練吓主動解決難題嘅能力。
