政情：張建宗犯政治大忌

張建宗當年做勞工處處長嘅時候，表現廣獲勞工界好評，因此大力支持佢升任勞工及福利局局長，但佢做咗局長三年多以嚟，勞福局卻不斷得罪勞工界，好多勞福政策同立法都只做得一半，唔湯唔水，例如推行新交通津貼計劃就拒行「雙軌制」；搞最低工資立法又冇解決飯鐘同休息日係咪有薪；就連公眾假期同星期六日撞期問題都係咁。

舊年年初一咁啱係星期日，根據現行法例安排喺之前嘅星期六補假，變相令全港唔使喺周六返工返學嘅市民少咗日假，非常唔公平。當時煲呔曾承諾會修例，令法例與時並進，使補假安排更具彈性。不過經過一年多嘅研究磋商，張建宗只解決到公眾假期撞星期日嘅補假問題，但公眾假期撞星期六就冇理到，大批打工仔同學生哥仍然有一半機會無啦啦少咗日假。

議員質疑違愛國精神

人民力量立法會議員黃毓民將於下月四日嘅立法會提出口頭質詢，質疑張建宗嘅決定同煲呔曾嘅講法唔對嘴，佢仲特別舉咗一個例子，就係今年嘅「十．一」假期原來正係撞正星期六，依法冇得補假，批評有關安排違反愛國精神。政府投放咁多資源大搞國民教育，又話要納入中小學嘅正規課程，又貼錢送啲香港學生返內地遊學，電台電視又日日播國歌，偏偏全港唔使喺星期六返學嘅中小學生，卻因為前殖民地訂落嘅法例而少咗日「十．一」補假，真係嘥氣兼嘥錢。

毓民又指出，出年嘅「十．一」咁啱又撞正中秋節翌日假期，因此安排喺十月二日進行補假，但究竟係「十．一」讓路畀中秋節翌日而需要補假，定係中秋節翌日讓路畀「十．一」而補假，當局並冇講清楚。呢個問題不單止涉及全港學校點樣稱呼嗰日補假，仲關乎到政府係咪政治正確。不過去到出年「十．一」，現屆政府已經落咗台，張建宗好可能亦已經失業，根據呢個看守政府嘅等收工管治心態，有乜都留番下屆先講啦！