政情：葉梁美蘭淡出Ball場
名媛葉梁美蘭尋日出席芭蕾舞團籌款晚會，佢話已做咗籌委三年，小時候亦有學過芭蕾舞，但因冇天分，學咗三年就冇學，而佢認為囡囡冇芭蕾舞天分，所以冇叫佢去學。佢仲話今次籌款晚會之後會淡出Ball場，要做家庭主婦，當然老公最開心。咁之後有乜搞作？佢話稍後喺復活節會去美國探囡囡。
同場嘅傅潔恩就話囡囡由三歲開始學芭蕾舞，已學咗七年。咁囡囡係咪有天分做芭蕾舞蹈家呢？佢話：「好難，自己想畀佢平均啲，想佢學多啲嘢，所以都有學音樂同體操。囡囡喺體操都幾有天分，但都驚體操比較危險。」佢又透露囝囝亦有學體操，如果小朋友應付到，會希望佢哋學多啲嘢喎！
葉梁美蘭淡出Ball場做家庭主婦，老公當然最開心。
傅潔恩話囡囡幾有體操天分。