政情：搞搞政：德成局長厚顏鳳凰也抽水

上個禮拜發表嘅審計報告，狠批政府搞東亞運嘅帳目混亂，臨時場地工程費用同宣傳超支，矛頭直插民政事務局局長曾德成，但佢仍死撐冇超支。

事隔幾日，佢喺《局長隨筆》就提及喺東亞運後要振興香港足運嘅「鳳凰計劃」，仲話政府曾發表研究報告提出一系列嘅建議，先決條件係足總透過改革重組架構，仲引述一名議員斷言足總絕冇可能通過任何修章方案，然而足總就喺上個禮拜四通過修章，將「根本冇可能」變成為可能。

相信大家仲記得，正正因為香港足球代表隊喺東亞運奪得歷史性嘅金牌，德成局長就講出要重振足運嘅豪言壯語，依家足總成功修章，好明顯係想話畀大家聽係佢令到足運鳳凰再生啦！

火鳳凰係置諸死地而後生，而德成局長繼續死撐，係咪能夠好似佢口中嘅足總咁，令東亞運超支變冇超支？咁就不得而知，但若果佢自比係鳳凰嘅話，佢依家肯定係隻飛唔起嘅鳳凰，等住畀立法會政府帳目委員會審啦！