政情：嫻姐擺高官上枱撐基層
尋日工聯會立法會議員黃國健嘅新辦事處開幕，儀式進行到一半落起傾盆大雨，當輪到勞工及福利局局長張建宗發言時，一向世界仔嘅佢即時大讚落雨係天降甘霖，叫大家唔好介意，而盛傳會參加立法會超級區議會選舉嘅工聯會副會長陳婉嫻喺發言時問台下街坊：「大家覺得局長係唔係撐勞工同基層？」喺嫻姐號召下，台下街坊個個拍手話支持。
跟住仲有後着，嫻姐又話今日到場前睇新聞，見到富貴黨搵埋成班僱主聲討最低工資制度，即時眼火爆，希望在場街坊記得撐局長企喺勞工一方，同埋要撐支持基層嘅政團。聽罷，張建宗面色即時一沉。
擺完一個上枱，嫻姐繼續話希望現場街坊都支持運輸及房屋局副局長邱誠武復建居屋，因為呢個係社會共識喎。現場街坊聽到，即時大聲叫好。唔使講，邱副局長唯一可以做嘅又係保持緘默，只係識得尷尬苦笑。