政情：田少延遲征西波子團
旅遊發展局主席田北俊早前出海撞親頭搞到雙眼睇嘢有疊影，抖咗兩個幾禮拜仍未有好轉，唔擔心就假。佢依家連行路都要好小心，遑論揸車，更加唔可以去歐洲自駕遊。
過去兩年暑期，田少都以團長身份帶隊揸「波子」歐遊，熱愛賽車嘅東華總理黃業光（John）都係鐵腳之一，兩人早就預算今年五、六月出發，再征西班牙，依家田少有事，歐遊大計被打亂。
上禮拜三，田少約埋十幾位團友，去尖沙咀食晚飯。見佢由田太攙扶到來，落樓梯時顯得小心翼翼，老友見到田少，紛紛上前慰問。聚會變成老友對佢嘅慰問大會，都幾掃興。不過，副團長阿John話等埋田少至出發，叫佢安心休息，其他團友亦一呼百應，決定將行程押後至今年底或明年初喎！
團友紛紛送上慰問，田少（左三）做東請食飯以示感謝。右二為黃業光、右一為餐廳老闆Joe Wong。