政情：派錢買唔到民心鬍鬚曾發爛渣

財政預算案上禮拜四晚喺爭罵聲中獲立法會三讀通過，正當大家以為一切都完結之際，親手炮製呢份「史上最廢」預算案嘅財爺鬍鬚曾竟然厚顏出嚟撩交打。

鬍鬚曾喺二月發表嘅預算案劣評如潮，不論泛民主派或建制派都喊打，最後佢喺民意威逼下先「跪低」發表「派錢方案」。唔少泛民都批評佢突然派錢有欠理財思維，亦話無助解決長遠社會問題，但鬍鬚曾一於少理，尋日喺網誌死撐派錢有理，仲怒轟泛民因政治鬥爭而冇投票支持政府向市民派發六千蚊嘅修訂議案，只係投棄權票，話喺議事廳內，投棄權票等於反對，令到修訂議案以三十四票低票通過。

若果份預算案係得民心嘅，市民就拍晒手掌啦，正正因為份預算案咁廢，社會上先會罵聲四起，紛紛上街抗議仲叫佢落台，歸根究柢都係佢嘅錯！依家份預算案低票通過，覺得面目無光嘞，佢唔單止唔反省，仲將責任推畀人，咁即係賴地硬啫，真係死性不改！

偏聽拒回應復建居屋

當提到未來將展開探討以填海及善用岩洞增加本港土地資源，佢仲話聽到部分政黨要求政府增撥土地起公屋。冇錯，各黨各派要求政府增建公屋係不爭事實，但呼聲更高嘅，卻係復建居屋嘅訴求。政府出名患有「八萬五恐懼症」，佢對興建居屋嘅要求隻字不提，睇怕又係佢偏聽嘅另一力證。

佢又叫政黨積極就本港嘅發展提出具體建議，一再寸佢哋唔好再流於口號式嘅反對，仲話政府近年花咗好多精力同時間，處理政制發展同政治，唔少焦點更轉移到政治鬥爭上，擺明再畀說話泛民聽。講到尾，倘若煲呔曾政府係真心聽民意，交到功課畀市民嘅，政黨自然冇機會亦唔使搞咁多嘢啦！