五一危機殺埋身 防範再有惡阿珍

歷史會不斷重複，醜聞更加如倒模複製又複製。年初三赤口同安徽旅霸扭鬥，導致香港旅遊業聲譽蒙羞嘅女導遊阿蓉，被旅遊業議會罰停牌半年，無巧不成話，上年七月因辱罵內地旅客影衰香港嘅惡女珍，最後亦係被處釘牌六個月。兩人唔止外形神似、劏客手法如出一轍，連受罰都似翻版咁，認真諷刺！

叮！大家咪誤會，太一叮咁留意阿珍、阿蓉，唔係對佢哋特別關心，事實上，「惡」有惡報因果循環乃不變定律，只係擔心香港旅業嘅命運啫，事關兩女惡名昭彰，個朵響遍神州，但係被罰釘牌半年，喺好多人眼中只屬小懲大戒，不足以起阻嚇作用，一個係咁，兩個又係咁，點樣重振內地遊客對本地旅業嘅信心？

太一叮關注旅議會對阿蓉處罰嘅另一個原因，係每年內地同胞大軍壓境嘅「五一」黃金周好快又殺到埋身，港府對導遊變刀手、帶客變劏客問題至今仍然袖手旁觀，好整以暇，一旦呢個旺季又爆出新醜聞，香港旅遊業塊招牌到時真係搖搖欲墜，前景令人憂心。

事實勝於雄辯，只要旅業「零團費」痼疾不除，導遊屈客強迫購物、與遊客爭執嘅醜聞勢會繼續發生。唔係咩？惡珍鬧客後隨即「伏法」，旅議會更加大鑼大鼓推出規管行業「新十招」，但只係半年光景，又冒出一個「翻版阿珍」惡女蓉，由此證明，旅議會就算再捉一百個阿珍阿蓉、阿珠阿娥嚟祭旗，都係於事無補，治標唔治本，阿珍一百零一號、阿珍一百零二號、阿珍一百零三號……陸續有嚟㗎！

其實，旅議會係無牙老虎，無力監管業內零團費導遊宰客問題，已經係行內公開嘅秘密，政府再唔出手，「五一」黃金周就係另一場迫在眉睫嘅旅業危機。政府早前提出檢討監管旅遊業建議方案，包括成立獨立機構取代旅議會規管，但係面對「五一」大關，遠水不能救近火。正如業界所指，政府必須盡快訂出短期措施，例如自行「放蛇」捉失德違規嘅導遊同旅行社，以加強阻嚇等，防止阿珍、阿蓉事件重演。長遠咯喎，就梗係要對症下藥一刀切除零團費呢個惡性腫瘤啦。

香港四大支柱行業早已分崩離析，只剩低旅遊業同金融業苦苦支撐，若然港府失職，連旅遊業都衰埋，香港就沉淪得更快，相關官員罪孽深重，遲早輪到佢哋被「釘牌」嘅咋。叮！