政情：棉花狂加價施榮懷頭痛
熱錢製造嘅通脹令小市民同老闆都好頭疼，中華廠商會副會長施榮懷就係其中一個，家族喺江西設有全省最大嘅棉紡廠，棉花係基本原材料，但係近期棉花價格急升，依家真係有錢都買唔到。
施家嘅廠專做棉花買賣及生產棉紗，屬於紡織業嘅上游工業，受到全球棉花價格飆升及炒作影響，棉花價格飆升兩倍幾，施榮懷直言，係佢入行咁耐未見過咁瘋狂升勢。佢哋嘅廠房一向同印度及美國入貨，但印度為咗自保，已宣布暫停棉花出口幾個月，佢哋惟有用存貨頂住，但都焗住要暫時轉為採購澳洲貨。
海外棉花減少供應，內地盛產棉花嘅新疆，當地出口身價亦一樣水漲船高，業內人士甚至戲稱棉花係「白金」添，有錢都未必買到。
施榮懷話近期棉花價格飆升，做廠都好辛苦。