政情：搞搞政：梁展文惹火校友怕怕
退休後入商界搵真銀嘅前房屋及規劃地政局常任秘書長梁展文，年前先因利益衝突上立法會交代，最近又因同地產集團再攜手合作，成為惹火人物。佢間母校拔萃男書院尋日搞咗個植樹籌款活動，請咗一眾名人校友，如立會議員張宇人等出席。
呢堆名人聚埋好開心，侃侃而談之際，忽然有人問咗句大家對梁展文事件點睇，奇怪嘅係，一眾校友聽到有關惹火校友嘅提問時，人人反應似得出奇，個個好似聽唔到咁，冇人接招、冇人表態，繼續風花雪月。明眼人知乜嘢事喇！
校友唔提啫，網民就踴躍發言。有網友話，梁展文上次入地產集團搞出大頭佛都唔知衰，第二次又嚟過，證明佢真係好等錢使。也有網友話，佢哋再續「錢」緣震撼全城，估計將有大把嘢殺埋身。
設計圖片