政情：張文遊英撲飛睇紅魔
好多香港人情迷英超，復活節在即，連場好波登場，白鴿黨張文光就一家三口撲定飛，飛過英國十幾日，旅行兼過睇波癮。
張文話，早前因為支聯會前主席司徒華病逝，農曆新年擱置咗外遊大計，最近心情逐漸平復，加上「紅魔鬼」曼聯頻頻旗開得勝，挑動咗佢嘅旅遊神經，咁啱囡囡又有假，一於飛去英國玩十幾日，順便睇埋波。張文話，買咗廿三號曼聯對愛華頓嘅飛外，仲撲緊五月一日曼聯作客阿仙奴，實行叉足電先至飛返香港繼續立法會嘅漫長會議。
臨急臨忙先嚟買飛，驚唔驚買貴飛先？張文聞言十分老定，皆因佢哋一家三口都係曼聯球迷會會員，所以有窿路撲飛，唔使捱黃牛飛都有得睇。