政情：搶咪男升壇做嘉賓

周日議事節目《城市論壇》係唔少政團關注嘅平台，捲入強姦指控嘅維園阿哥就喺呢度崛起，結果唔少政黨嘅第二、第三梯隊都爭相出席。上星期日一「搶」成名，喺港鐵活動上衝上講台，搶走運輸及房屋局局長鄭汝樺個咪嘅社民連成員黃軒瑋，今日就獲邀上論壇做嘉賓，討論《衝擊高官再而三 政府管治難上難》。

不過，搶咪男都面臨挑戰，事關有懷疑係前社民連成員嘅網友，就留言警告《城市論壇》唔係社民連地頭，話佢哋冇資格出席。仲有人講到明會狙擊黃軒瑋，話要等佢試吓畀人搶咪嘅滋味。節目監製謝志峰亦話，絕對唔會好似警方處理反對預算案示威咁，因為一啲網上留言就如臨大敵特別加強保安。佢強調，有市民搶高官咪，係為咗宣洩對社會嘅不滿，呢個節目嘅目的，同樣係畀人透過大氣電波發表意見、宣洩不滿，如果有人喺度搞事，即係代表嗰個人冇好好利用呢個難得嘅平台，希望大家三思，唔好將論壇變成黨爭嘅場地。