政情：小記者圍攻李少光

保安局局長李少光統領多個紀律部隊，畀人包圍真係好大件事，不過，好似尋日畀班小記者包圍，卻係另一回事。

光哥尋日趁周末出席名校拔萃男書院嘅一項活動，好多學校都設有小記者，由佢哋報道校園大事，尋日光哥一到男拔，就畀班男拔小記者包圍，只見呢五、六位校園小記者準備充足，有人孭住相機，有啲攞住紙筆，大家分工合作，光哥去到邊追到邊。

光哥習慣晒畀人採訪，對呢班小記者更加和氣，佢喺校園參觀時，班小記者就貼身追擊，仲有人問光哥細個鍾意玩乜嘢等，佢哋嘅認真態度同得意提問氹到光哥好開心，上鏡都笑瞇瞇。

李少光喺校園參觀時，五、六個小記者圍住佢訪問。