政情：推地攪亂市林鄭懵盛盛

樓市狂熱，連新界偏遠市鎮嘅樓盤都動輒賣六、七千蚊一呎，政府左拖右拖下，日前又再宣布主動推出幾幅土地拍賣，發展局局長林鄭月娥尋日出席個電台節目時，更好開心咁宣布「今年係住宅土地供應豐盛嘅一年」，不過，佢嘅豐盛只係講麵粉，唔係麵包。有學者就即刻點醒政府，政府一陣賣地、一陣招標，加上原本嘅勾地表制度，令原本應該簡單嘅市場亂咗，訊息又混亂。希望林鄭唔係玩泥沙式嘅「豐盛」啦。

學者寸爆賣地政策

林鄭尋日出席一個電台節目解釋政府主動推出幾幅土地，佢話，今年頭兩個月樓市繼續上升咗百分之七，所以主動推多啲土地，至於今次推售嘅地部分係優質靚地，林鄭就話，要均衡樓市就要兼顧唔同層面嘅住宅市場，暗示豪宅價格升得多，政府咪推多啲豪宅地囉。

不過，本地樓市熾熱多時，政府一直反應好遲鈍，近期雖然幾次宣布推地，但出嚟嘅效果都好差，譬如政府推出限呎地，但招標結果卻令人好驚，擔心始終落得發展商高價攞地、最終一定高價賣樓嘅下場。近期政府又再宣布主動賣地，同樣令市場擔憂係咪家吓嘅勾地表制度已經冇咗？一句講晒，政府嘅土地政策搞到市場人士都有啲唔適應。

港大房地產及建設學系副教授李寧衍尋日都話，政府政策應該以簡單為主，依家政府嘅土地售賣政策中，既有賣地、招標，又有勾地表制度，質疑咁樣反而會令到市場訊息混亂。內地調控樓市時興組合拳，香港政府就嚟嚟去去都係推地一招，咁樣係打盲拳、定係千變萬化得一招呢？