贏了官司輸訟費 香港法治真奇怪

開講有話，愛國愛港冇前途，真係冇講錯o架，呢，又有辦你睇喇！

自稱「公信第一」嘅《明報》，○八年報道「香港拉登」馬照聲嘅消息，刊登誹謗《東方日報》及其管理層嘅內容，去年被原訟庭判處誹謗指控成立，須向東方賠償合共一百八十萬元，當中包括加重性額外賠償。奇怪嘅係，《明報》提出上訴後，雖然上訴庭確認誹謗指控成立，但就將賠償金額大幅減少至二十萬元，而且作出臨時頒令，要遭誹謗嘅東方全數支付《明報》上訴嘅訟費，簡直豈有此理！

是非曲直黑白分明，成件事嘅來龍去脈要追溯到○一年嘅「香港拉登」馬照聲案。當年馬照聲因不滿「千古罪人」董建華施政，恐嚇喺超市飲品落毒，東方恐禍及無辜，即時報警並協助警方拘捕馬照聲，及時阻止被落毒食品流出市面，結果馬照聲被判入獄六年八個月。點知呢個冒牌拉登懷恨在心，出獄後展開報復，百般滋擾及抹黑東方報業集團，結果再被裁定兩項刑事恐嚇罪成，判監九個月。

呢件事嘅是非黑白本來好清楚，一言以蔽之，《明報》自作自受，絕對係咎由自取，與人無尤，今次上訴庭居然反過來懲罰東方，但又講唔出理由，實在太過不可思議喇。話時話，東方好心無好報，長期被人針對，贏官司輸訟費都唔係第一次o架啦。九六年爛果報擅自盜用前東方刊物《東方新地》一篇題為「王菲懷孕乘飛機」報道中嘅獨家照片同雜誌封面，東方告爛果報侵權，喺原訟庭勝訴，僅獲賠八千零一蚊，但就要負擔對方嘅一百萬元訴訟費。東方不服，一路上訴到終審法院，雖然次次勝訴，最終仍要負擔合共二百幾萬元「懲罰性」堂費，係咪離奇到你唔信呢？

一次係咁，兩次係咁，次次都係咁，香港嘅所謂法治，真係令人莫名其妙。呢，正如一向敢言嘅全國政協委員劉夢熊話齋，香港話就話回歸咗十四年，其實治權從未回歸，愛國有鬼用咩，講正義有鬼用咩，反中亂港先至有運行吖嘛。所以咯喎，第日再見到類似香港拉登嘅事件，千祈唔好理，唔係嘅話，隨時好似趙連海嘅下場都有之。劉夢熊仲語重心長提醒東方，當今世道黑白不分，連大陸網、大陸官網都插隻腳落嚟誹謗東方呀！

叮！國之將亡，必有妖孽。港英餘孽作怪，香港妖氣沖天，想唔沉淪都幾難！