政情：葉劉寸警方示威情報獻醜
立法會日前表決預算案時，中環變咗藍白色海洋，講嘅係警方殺氣騰騰嘅超級部署，做過保安局局長嘅新民黨主席葉劉淑儀過去一向錫住前下屬，尋日都罕有地發炮，質疑警方唔識收風，鬧出笑話。警方情報工作太差真係足以致命，唔可以話係笑話咁簡單。
警方一連兩日派出數百名警員、數十架警車，以及無數鐵馬同防暴裝備部署喺中環，睇嚟可以應付最少五百人或以上嘅示威㗎，點知前日朝早只有幾個社民連成員到場，晚上更只見示威常客「女長毛」雷玉蓮。
葉太話，按早兩日情況，警方明顯係收錯風。佢又話，啲示威者想搞嘢，尤其係想發動有大批人參與嘅活動，必須透過各種網上工具「吹雞」，唔好話擁有超級電腦嘅警方，就算小市民攞部手機上網都可輕易收風，警方冇理由擺咗個大烏龍噃！