政情：過兩日CS癮 林公公恨到

官場邊個最搏？呢期梗係要數啱啱通完波仔嘅政制及內地事務局局長林瑞麟喇，林公公早前忽然入院，翌日仲旋風式出院，撲返政府總部添。政府憲報尋日更披露，林公公只係攞咗一日病假，呢頭瞓病床，嗰頭已經返工。政圈傳佢係博升職，嚟緊十六同十七號，政務司司長（CS）放假，林公公執到署理機會，可算撲到頂臨時司長烏紗，過吓升官癮都好喇！

坊間一直盛傳林公公對政務司司長嗰位極有興趣，早排通波仔後迅速復工，無非係為咗證明自己身體健康。復工做番自己嗰份工外，唐唐喺本周六起放假兩日，政府內經驗最老到嘅教育局局長孫明揚咁啱要公幹，林公公仲要做埋佢嗰份，足見佢身體真係好fit，鬥志仲好旺盛添。

林公公通完波仔後嘅表現真係幾神勇，早兩日喺立法會開會時，仲戰鬥力十足，發言時不斷揶揄人民力量立法會議員黃毓民，林公公真係有所圖噃！