政情：俄總統駕到 阿Ron頻撲
港交所聽日有兩件盛事，主席夏佳理（Ron）同行政總裁李小加都要連走兩場，因為聽日俄羅斯總統梅德韋傑夫將會大駕光臨參觀港交所，兩名高層梗要親自接待喇，咁啱「港交所盃」又喺聽日舉行，佢哋兩個忙完呢邊，又要即刻撲去馬場。
梅德韋傑夫參觀港交所，聽聞保安十分嚴密，閒雜人等冇可能埋到總統身，好彩呢一日唔係交易日，交易大堂都比較少人。過去，國家領導人參觀港交所，港交所都會送件有靚冧把嘅紅衫仔畀佢哋，今次梅德韋傑夫唔知有冇呢個安排呢？
至於「港交所盃」，就係當日賽事嘅第八場，鍾意此道嘅阿Ron點會只係主持大局咁簡單呢﹖