政情：發叔面黑快閃避記者
「新界王」劉皇發一向長袖善舞，尋日仁愛堂新一屆董事局舉行就職典禮，身為仁愛堂創辦人嘅發叔都有出席，由於立法會議員個人利益監察委員會日前公布有關佢涉利益衝突嘅調查報告，雖然成功甩身，但發叔就未親身回應過嗰份報告，所以唔少傳媒都想捉到佢，點知活動上一直嚴肅嘅發叔似早有準備，轉過頭就快閃走人。
發叔前日喺立法會已經極力迴避親自交代事件，連埋報告公布當日，佢老人家已經避咗三日，尋日佢出席公開活動，但喺活動進行時面容都好謹慎，有時更嚴肅到好似心事重重，甚至面黑添，直到活動完結，佢都冇面對等佢嘅傳媒，要大會工作人員轉達，大家先知發叔原來已經無聲無息咁離開咗。
做得公眾人物，又身居行政會議成員高位，發叔慣咗面對傳媒喇，呢次一避再避實在好少見。
劉皇發好似心事重重咁，唔通真係咁困擾？