兒科又爆煲　醫局點收科

將醫管局比喻為千瘡百孔嘅爛藥煲，真係好貼切。呢，公立醫院繼內科同婦產科醫生大控訴之後，兒科醫生亦忍無可忍發出怒吼，警告初生嬰兒深切治療部服務超出負荷，瀕臨爆煲。叮！醫管局職責係治病救人，點知自己周身病痛，自救無方，真係莫大諷刺！

開講有話：官逼民反，民不得不反。呢句話固然係香港社會當前寫照，但以微觀角度套用喺醫護界，一樣咁應景。前線醫護人手嚴重短缺，壓力爆煲，紛紛揭竿起義，杏林革命戰線不斷蔓延。大家應該記得，早前屯門醫院內科集體控訴，一石激起千重浪，跟住公立醫院婦產科醫生組成關注組，要求當局防止內地孕婦來港產子潮演變成海嘯，淹沒本地婦產科服務，群情洶湧，火頭未熄，依家又輪到兒科發難。

話時話，兒科護士流失率年年上升，加上舊年嬰兒出生率增加，去到八萬八千之多，兒科壓力與日俱增，其中初生嬰兒深切治療部更係重災區，全港公立醫院嘅一百張深切治療病床長期爆滿。大家都知，入得深切治療部嘅嬰兒，多屬早產或病危，需要護士一對一照顧，可惜由於護理人手不足，結果一個護士要照顧兩個甚至三個嬰兒，唔做到氣咳至奇。

正因為嬰兒深切治療病床近年經常爆滿，搞到私院轉介嬰兒個案成日要排隊等位。茶樓飲茶等位就話可以等吓啫，搶救小生命點可以等㗎？拖延幾分鐘都隨時造成無法挽救嘅悲劇，邊個負得起呢個責任先！所以呢，兒科醫生組成關注組，要求港府正視問題，絕對有的放矢，若然當局繼續翹埋雙手唔做嘢，一切後果自負。

其實，今次兒科醫生開炮正好反映公共醫療體系千瘡百孔，內科先爆煲，跟住係婦產科，隨之而來嘅就係兒科淪陷，引發連鎖效應，惡性循環。不難預見，若然「醫護荒」頑疾再唔根治，其他科必然亦會陸續出事，公共醫療制度遲早崩潰嘅咋。

正如醫護界話齋，港府應該對整個醫療制度進行大手術，認真改善前線醫護人員工作環境，提升士氣，挽留人才，以及增加病床等醫療資源，咁先至係治本之道。食物及衞生局局長周一嶽宣布公立醫院對來港產子嘅內地孕婦落閘截龍，根本只係頭痛醫頭、腳痛醫腳，對整個公共醫療面對嘅困境，唔好話止血，止咳都唔得。

唉，醫管局爛藥煲配上周一嶽呢個庸醫，想唔爆煲都幾難！