政情：周文耀考察內地貧鄉
自周文耀退任港交所行政總裁後，好少喺公開場合露面，尋日佢出席一個頒獎禮，致辭時都講笑咁話好耐冇公開發言，今次要講足半個鐘，希望大家體諒吓，大家當然落足耳力聽啦，周文耀就分享咗一個印象深刻嘅體會。
話說平時官仔骨骨嘅佢，喺舊年退休後曾經攀山涉水去到內地嘅偏僻地區，親身考察當地居民嘅生活情況。佢好感慨咁話，想像唔到貧富懸殊嘅差距可以咁大，當地居民要面對冇自來水、冇電嘅窘境，嗰種生活環境同大城市完全唔同。
講完考察體驗，佢又妙論傳媒工作。有記者話投資銀行家工作唔易，所以人工比做傳媒高一大截；佢就話唔明點解投資銀行家人工咁高就真，反而記者中肯透徹嘅報道，對香港成為國際金融中心好重要。佢咁識講說話，當然引嚟在場傳媒嘅掌聲啦！
周文耀讚記者中肯透徹嘅報道，對香港成為國際金融中心好重要。