眾所周知，廠商會嘅立法會議員林大輝係孫燕姿嘅超級粉絲，早前孫燕姿被踢爆上月底同拍拖五年嘅亞裔荷蘭籍「鬍鬚男」納迪姆喺新加坡申請登記結婚，偶像嫁人去，大輝咪情天霹靂呢？
非也！大輝話戥孫燕姿開心喎，仲話女人最緊要嫁得好，千祈唔好返頭嫁。本來佢仲想喺微博留言祝賀偶像，但始終過唔到自己嘅心理關口，所以都係算罷啦！
咁對「鬍鬚男」嘅印象點呀？大輝話知道佢係運動鐵人，喺報紙睇到佢張相，覺得佢唔算靚仔，但咁都唔緊要，人唔靚，心靚就得咯喎！唔通大輝愛屋及烏？