政情：搞搞政：林公公為健康冇啖好食
上禮拜極速通波仔出院嘅政制及內地事務局局長「林公公」林瑞麟，前後計埋請得一日假，感冒都冇好得咁快。外間有傳聞話林公公為咗自己嘅政治前途更上一層樓，扮到神采飛揚，究竟係咪真就冇人知，但就知道佢冇啖好食啫！
林公公尋日同幾個議員一齊食晏，雖然只係西餐廳嘅普通午餐，但佢都唔敢亂食嘢。好以頭盤個凍肉沙律，佢就挑走晒啲凍肉，就連主菜都只係食魚。到甜品時間，佢對住雪糕望而卻步，淨係敢食鋪喺碟邊嘅藍莓。滿枱美食都唔敢掂，好明顯林公公係戒口要食得清淡，希望盡量減低膽固醇。
據講，呢餐飯係喺林公公入院前約定，都係交流吓嘅啫，點知尋日就變咗健康座談會，大家齊齊研究點樣減低膽固醇。林公公嘅心得就係食少啲紅肉同行多啲樓梯做運動，有議員就反建議林公公要飲多啲紅酒，話有助降膽固醇喎。