依家啲80後、90後出名夠激，經常喺論壇或交流會上語出驚人，問到台上與會者口啞啞。有「理大秋官」之稱嘅理大校長唐偉章尋日喺校園內同班學生交流時，同樣被問到啞口無言。
啲學生問咗乜嘢辛辣問題？首先問點解電腦室唔夠櫈，搞到有電腦但冇櫈坐；跟住問如果有課室空置，可唔可以借用做group project；第三條仲妙，問點解Ｍ座樓嘅飲水機擺得咁遠，可唔可以近啲喎。嗱！一啲都唔尖銳，仲係啲雞毛蒜皮嘅事，但就令到理大秋官呆一呆唔知點答，要交畀台下嘅校管高層職員代答。