政情：叛將火併富貴黨爭聽僱主苦水

選舉臨近，各大小政團乜嘢都鬥一餐。最低工資條例搞到天怒人怨，多個工會最近就爭相搜刮啲無良僱主剝削基層僱員嘅個案，鬥搞遊行示威同申訴大會，齊齊爭選票搶曝光。其實，工商界嘅政黨咪一樣爭。

最低工資法例仲有大概兩個禮拜就正式實施，大批被扣減有薪飯鐘同休息日、甚至被裁員嘅僱員固然不滿，但其實一眾因成本上升而面臨蝕本、甚至被迫倒閉嘅中小企僱主，亦係滿肚苦水。近年轉型集中走中小企路線嘅富貴黨，後日搞最低工資僱主苦水會，畀啲中小企僱主訴說佢哋嘅不滿同難處，同時仲歡迎打工仔嚟發表意見，藉此消消大家嘅怨氣，仲希望可以尋求共識添！

眾所周知，由富貴黨分裂出去而成立嘅經濟動力，過去一直同富貴黨爭，爭代表商界，又爭代表中小企，聽聞經濟動力亦計劃喺下個禮拜搞項類似嘅吐苦水活動，但就未必會用政團嘅名義，可能由召集人林健鋒代表嘅香港總商會牽頭，規模仲肯定勁過富貴黨嗰壇喎！

但知情人士否認佢哋抄富貴黨橋，強調總商會都有好多中小企會議，再者即使係大公司跨國企業，都要聘請清潔工同保安員，同樣受最低工資影響，由總商會搞苦水會絕對唔誇張。呵！即係換殼去搞啦！

商界或促當局暫緩執法

咁訴完苦之後可以點做？有商界人士話最低工資嘅實際影響有幾大，最快都要法例實施兩、三個月後至睇到，暫時佢哋會靜觀其變。但如果最後真係有好多僱員被裁員，好多僱主蝕大本關門大吉，佢哋唔排除會發動新一輪行動，包括要求當局暫緩執法，或者提早檢討時薪二十八蚊嘅法定最低工資水平，睇吓有冇機會降番低啲。

記得早喺兩、三個月前，勞工界要求加快檢討工資水平，遭工商界強烈反對，依家卻風水輪流轉，認真諷刺！