食環署恃強凌弱 雞蛋伯痛失生計

幾年前有個笑話，駐伊拉克美軍管唔掂巴格達，搵中國城管去搞掂咗。家陣城管要「重塑形象」，講求文明執法，呢份工未必勝任。冇有怕，本港仲有個惡過惡爺嘅食環署。

食環署惡死，連內地城管都甘拜下風。呢，尋日銅鑼灣鬧市就上演一齣「港產城管野蠻執法欺凌耆英小販」嘅實景街頭劇。話說七十四歲嘅吳伯喺銅鑼灣道擺賣炭燒雞蛋仔超過廿年，「雞蛋伯」街知巷聞。尋日佢如常開檔，近十名食環署職員突然殺到，要拉要鎖要檢控。

食環署人多蝦人少，現場近百名街坊睇唔過眼上前理論，直斥食環署不近人情。職員見群情洶湧即時「班兵」，搵咗二十幾個警員到場協助。擾攘咗個幾鐘之後，吳伯連人帶架生被帶番警署。

老人家堅持自食其力，冇攞綜援，但最近短短個幾月內已經被檢控七次，多次被沒收架生，更被罰款五千幾蚊，生活大受影響。有街坊話，曾向食環署職員報料，指附近港鐵站外亦有無牌小販擺賣，但對方闊佬懶理，質疑食環署針對性檢控吳伯。

「雞蛋伯」本來已經搵食艱難，仲要畀呢班友搞到痛失生計，冇啖好食，食環署真係惡得交關。咁搞法，係想趕老伯去申請綜援吖，定係想幫關愛基金搵扶貧對象呢？叮！

講開針對性檢控，呢啲陰招食環署用慣用熟。嗱，上周五幾個食環署小販事務隊職員喺屯門新墟街市附近巡查，要求一間被指阻塞通道嘅生果檔將貨物搬入店內，期間有張木櫈跌落職員旁邊，有人即時高叫被「車櫈」襲擊。警方到場翻查閉路電視片段，證實襲擊係子虛烏有。

店主事後踢爆，自從舊年同食環署職員發生過爭執之後，對方每日嚟巡查四次，懷疑有人公報私仇，存心玩嘢。今次好彩有閉路電視做證據啫，唔係嘅話，食環署咪可以隨心所欲，屈得就屈，隨便拉人封舖？

唔怪得食環署幾乎年年都成為政府部門「投訴之王」啦。佢哋舊年接到嘅投訴超過三千宗，再度蟬聯「冠軍」。涉及個案五花八門，最離譜嘅包括當值期間集體「劈酒」兼大玩骰盅，甚至旁若無人公然違規食煙。審計署發現，食環署平均每個員工每年申領近九日病假，較整體公務員請病假水平高約六至七成，名副其實係個「大懶蛇俱樂部」。

捉老鼠、滅蚊蟲唔見食環署咁英明神武，野蠻執法就做到加零一，講到恃強凌弱，食環署比內地城管有過之而無不及，直頭做得師傅。