SUN世代：美顏天后為客甘毀容

吳紫青（Grace）堪稱美容王后，擁有多項專業資格，更自創糅合中、西、日護膚文化的嶄新概念，為業界譜出新章。逾十七年的美容生涯中，她堅持以心待客，為解決客人困擾，不惜親自當白老鼠，「整爛塊面」再研究拯救方法，更曾因而患上筋膜炎，熱誠態度令不少客人感動流淚。對美容如此堅持，全因她深信工作充滿意義：「見到好多女仔成個人變得正面，由冇信心變得有信心，真係好有滿足感！」

Grace絕對是其美容王國的「生招牌」，即使不施脂粉，肌膚仍完美無瑕。真金不怕洪爐火，她即場以儀器測試，結果顯示其皮膚質素等同三個月大的嬰兒，惹人羨慕。

「個個女仔都鍾意扮靚㗎啦，我都唔例外。」Grace笑言，自小對美容有濃厚興趣，夢想長大後成為美容師。為實現夢想，她先後取得日本現代美容學文憑、著名西方美容學院學位及港大中藥營養學文憑，對中、西、日美容知識瞭如指掌，更自創將三地的護膚文化融合，取長補短，根據香港女性的膚質，度身訂造獨有的護膚方法，為業界帶來嶄新概念。

整爛半邊粉面 尋求拯救良方

一九九五年，Grace創立自己的美容院，至今已經十六個年頭，為無數女性打造美麗。她對美容非常執着，為了要有解決客人皮膚問題的十足把握，她竟犧牲自己的嬌嫩肌膚，親自當白老鼠！她分享其中一個例子：「有個客人嘅皮膚突然變得好差，我就問佢用過乜嘢護膚品，然後買晒番嚟搽半邊面，整到同佢一樣嘅爛面程度，再研究點樣救番塊面，搵到成功嘅方法先幫客人做。」

別以為「整爛塊面」已經超乎想像，Grace原來還有更「恐怖」經歷！她憶述：「有個客人做完激光之後皮膚好差。我就用儀器跟佢個療程照做一次，點知搞到成塊面腫晒，三個幾鐘冇知覺，睇醫生發現係筋膜炎，痛咗十日，晚晚瞓唔着！不過最後幫到個客，覺得好值得！哈哈！」

Grace如此「拚命」，全因她待客如真心朋友。「佢哋對我好好㗎，會整老婆餅、織冷衫畀我！我當時結完婚掛住做嘢，冇去度蜜月，有個客專程訂好晒去澳門嘅酒店同船飛送畀我，叫我放假去玩！」

無懼沙士接客 護士感動落淚

與客人的友情，除了笑容，亦有動人熱淚。Grace曾在沙士期間，無懼疫症，接待一名當護士的客人，令對方感動落淚。「當時佢做嘢做到好攰，但間間美容院都怕咗佢，令佢覺得自己被遺棄。佢一打畀我，我就即刻叫佢嚟，佢好感激我畀佢一個放鬆休息嘅機會，之後仲感動到喊咗出嚟！可以幫到佢，我都好開心！」

Grace對工作擁有無限熱誠，因她深信美容並非單單令人外表漂亮，而是更能改變整個人的生活態度，為人帶來快樂：「覺得自己做嘅嘢好有意義。好多女仔覺得自己差，比唔上其他人，抬唔起頭做人，但我幫佢哋做完療程之後，唔只變靚咗，仲好似重生咁，佢哋由冇信心變得正面積極，令我好有滿足感！」

Grace's Profile

婚姻狀況：已婚，育有兩子

現　　職：Black & White Beauty創辦人

專業資格：日本現代美容學ICA文憑、Frederique Academy ITEC學位、香港大學中藥營養學文憑、黑龍江中醫藥大學中醫美容專業文憑、中國國家勞動部美容師技術執業證書、香港美容業總會第一屆資深彩光師認證