政情：曾鮑笑薇搞特權玩封升降機

董建華太太董趙洪娉多年前搭飛機，曾要求機艙人員安排佢坐較寬敞嘅1A座位，仲大聲反問職員：「你知唔知我係邊個？」事件傳出後畀人話佢恃勢凌人，從此「A1」就成為特首夫人嘅別稱。現任「A1」曾鮑笑薇日前去酒店，獲享封升降機服務，即係又搞特權，辣慶咗其他酒店貴賓。

事件發生喺金鐘一間五星級酒店，有一日喺午飯嘅繁忙時間，竟然有酒店職員強勢封升降機，聲言部升降機要預留畀VIP使用，其他趕住搭升降機嘅客人被迫滯留大堂。咁搞法，在場人士固然鼓譟，其中一名趕住去開會嘅澳洲商人更大聲質問：「你（職員口中的VIP）以為自己係邊個？」事後先知嗰位VIP原來係「A1」。

搞出咁嘅風波，酒店隨即沙冧，承認佢哋喺呢件事嘅處理手法有待改進，但同時強調，佢哋搞出呢個大頭佛，某程度上都因為佢哋事先唔知有呢位貴賓大駕光臨喎。