政情：霍公子同四太頻聚頭

賭王何鴻燊分產風波平息，一切又回復正常，澳門馬場尋日舉行澳博盃賽，身為澳博執行董事嘅立法會議員霍震霆都畀面撐場。澳博董事四太梁安琪話，霍公子係澳博董事，澳博搞活動，佢當然支持。

澳門四季酒店前晚衣香鬢影，四太帶埋啱啱落機嘅囝囝何猷亨出席《Macau Tatler》第三屆周年舞會，霍公子孖啟剛、啟山到場，行政會議成員梁智鴻太太就搵啱啱返香港嘅囝囝Eric做舞伴。

澳博舊年勁賺近三十五點六億元，四太喺澳博地位更見穩固，前晚佢同澳博行政總裁蘇樹輝都有出席晚會，加埋霍公子，澳博咁多高層聚頭，莫非有嘢傾？霍公子笑笑口咁話只係嚟食餐飯，點知尋日又見佢現身澳門馬場。蘇樹輝話前晚喺晚宴上見到霍公子，所以請佢去睇澳博澳門打吡同新葡京盃，佢一口答應，四太亦話同霍公子關係一向好好，加上對方係澳博執行董事，梗要嚟支持。