政情：高官練武功平民憤太遲

近年唔少示威者都用較激烈嘅方式表達訴求，尋日新鮮熱辣又一單，運輸及房屋局局長Eva鄭汝樺出席港鐵活動時遇到示威者衝上台搶咪，幸有港鐵主席錢果豐眼明手快上前護花。

請保安跟身促進就業

相信大家仲記得，先有政務司司長唐唐被掟鞋，跟住煲呔曾聲稱畀人撞心口，再有人衝上台，好彩民政事務局局長曾德成一個「熊抱」為佢解圍，示威者中招，立時全身僵硬，最後拉扯間仲同一個G4警員雙雙跌落台添。德成局長呢吓奮不顧身護主令佢聲名大噪，曾幾何時仲做過網絡紅人，總算係意外收穫吖！之後煲呔曾出出入入都有大批人簇擁住，好聽就叫有威勢，唔好聽咪叫虛怯囉，仲勞民傷財添！

唔通依家班高官真係要「食夜粥」？即係花時間學縮骨功、金鐘罩、乾坤大挪移或練埋十三太保護身至得？如果資質唔好又冇學武天分，嫌學得太慢嘅話，其實仲有一個方法，反正依家最低工資實施之後，一啲基層工種從業員，好似保安咁都話擔心失業，既然係咁，高官每次出巡做騷不如都請大批保安跟身，仲要個個時薪都高過最低工資二十八蚊，到時既可以保障人身安全，又可以促進就業，一石二鳥，真係諗得過㗎。

老實講，就算班高官學到十八般武藝上身都冇用，事關示威方式愈嚟愈激烈，倒不如切切實實解決貧富懸殊、年輕人置業困難、社會流動性停滯等等問題好過啦！