骨灰龕例玩死人 還要諮詢到何時

香港骨灰龕位供求失衡，違規經營亂象叢生，搞到市民嘅先人骨灰無處安放，死不安息，講句難聽啲，港府嘅骨灰龕政策一團糟，正式係失禮死人。嗱！當局為應付民意，話下半年會就發牌規管私營骨灰龕場進行第二輪諮詢，不過，所提建議唔少僅屬花拳繡腿，姿勢大於實際，甚至被彈思慮不周，添煩添亂，結局隨時又係「玩死人」o架咋！

港府無能，香江沉淪，依家做香港人都幾閉翳，生前怕買唔起樓，死後憂無處容身。「生無安居之所，死無葬身之地」乃舊社會悲歌，今日竟然喺香港上演，令人唏噓。唔係太一叮多愁善感，當局檢討骨灰龕政策如牛步蝸行，好多孝子賢孫都心有同感，而當局提出嘅規管建議，睇咗更加令人激心。

公營骨灰龕一位難求，私營龕場良莠不齊，陰宅呎價貴過豪宅，講來講去，問題出於供求嚴重失衡，但政府未能對症下藥，提出增加龕位供應嘅嶄新構思，反而縮骨卸膊，倡議先人骨灰存家中，咁咪即係變相將處理骨灰嘅責任推番畀市民。再講，將死者骨灰置於家中，有違中國人「陰陽分隔」傳統，如果港人唔介意，早就咁做啦，十幾萬銀買個龕位，又要長途跋涉拜祭，貪過癮咩！

政府對骨灰龕位供不應求闊佬懶理，對規管私營龕場就發茅出招，有殺錯無放過。正如業界批評，當局建議私營骨灰龕場牌照只限五年，往後須每五年續牌一次，徒添消費者不必要嘅擔憂，而規限龕位指定「受益人」，雖言有助壓抑炒風，但同時亦褫奪咗消費者使用龕位嘅彈性。花拳繡腿，虛應民意，效用幾大無人知，但即時就為孝子賢孫添煩添亂，你話呢個政府係咪玩死人吖！

計太一叮話齋，諮詢文件千瘡百孔不足為奇喎，所謂骨灰龕檢討諮詢，不過一場敷衍民意嘅大龍鳳嚟啫。唔係咩？一個骨灰龕問題，諮詢再諮詢，研究復研究，唔少老人家隨時等到行將就木，都未搵到一個安息之所啦！

話到尾，夕陽政府等收工，骨灰龕問題咁棘手，咪拖得就拖囉，上年七月做第一輪諮詢，今年下半年做第二輪，屈指一數拖到諮詢結束，都夠鐘走人啦，一切手尾咪等下屆政府收拾囉，呢個政府咁縮骨，邊有死錯人o架！