政情：賭王380萬元捐日賑災
早前圓滿解決家庭紛爭嘅賭王何鴻燊，近日好關心日本大地震同海嘯引發嘅嚴重災情，佢尋日捐出三百八十萬港元，經香港紅十字會轉送到日本災區，獲日本駐港總領事隈丸優次親身代表日本及日本國民表示衷心致謝。
賭王話見到災情之嚴峻，佢深感哀痛，並致以深切慰問及摯誠嘅祝福，但佢亦相信以日本人堅定嘅信心同努力，以及各方嘅關懷同支援，一定可以克服危機，早日重建家園。深諳日文嘅賭王仲用日文向日本巿民送上祝福，勉勵佢哋要努力加油：「衷心祈求大家都平安無事，謹此致以慰問，請大家加油！」
賭王同日本淵源甚深，一直推動港澳同日本嘅經濟合作，所以早喺八七年已獲日皇頒授「勳三等瑞寶章」，表揚佢喺促進三地相互了解同密切關係上嘅傑出貢獻，難怪今次日本發生事故，佢亦零舍關注。
何鴻燊捐出三百八十萬元到日本賑災，日本駐港總領事隈丸優次衷心致謝。